25-anyos na lalaki, arestado sa tangkang pananaga sa Lucban, Quezon
Arestado ang isang 25-anyos na lalaki dahil sa tangkang pananaga sa isang farm owner sa Sitio Pandak, Barangay Nalunao, Lucban, Quezon nitong Huwebes, December 8.
Kinilala ng Lucban PNP ang biktima na si Peter Limuel Abillar Faller, 38-anyos, farm owner habang ang suspek ay kinilalang si Carl James Jimenez, 25-anyos, caretaker at pawang residente ng nasabing lugar.
Batay sa imbestigasyon ng pulisya, nasa ilalim umano ng impluwensya ng alak ang suspek nang magkaroon ng alitan sa pagitan nito at ng kanyang live-in partner.
Dahil dito, nilapitan ito ng biktima para resolbahin sa mabuting paraan ang alitan pero nagtungo ang suspek sa bulatihan para kunin ang kanyang bolo saka inatake at tinaga ang biktima pero nakaiwas ito habang binibigkas ang salitang “papatayin kita.”
Samantala, nagawa namang awatin ng kanyang kaanak at i-turnover ang suspek sa mga awtoridad dahil sa kalasingan nito.
Sa ngayon, nasa kustodiya na ng Lucban PNP ang suspek para sa kaukulang dokumentasyon at disposisyon.
