Bagong silang na sanggol inilagay sa plastic, inabandona sa Lopez, Quezon

Isang bagong silang na sanggol ang natagpuan ng isang residente na nakalagay sa loob ng isang plastic nitong Miyerkules ng umaga, November 16, sa Brgy. Gomez sa bayan ng Lopez, Quezon.

Ayon sa report ng Lopez Municipal Police Station, lalaki ang naturang sanggol na natagpuan ng isang 32-anyos na si Rosa Fe Ausa, bandang alas 6:20 ng umaga at residente ng nasabing lugar.
Batay sa pahayag ni Ausa sa mga awtoridad, nakarinig siya ng iyak ng sanggol kaya’t hinanap niya ito. Nakita niya ang isang plastic sa tabi ng kalsada at nang kaniyang tingnan ay nakita niya sa loob ang sanggol at nakakabit pa ang umbilical cord.

Agad niyang dinala ang sanggol sa Memorial District Hospital para sa medical treatment.

Nagsagawa na ng imbestigasyon at pagsusuri sa CCTV ang ang Lopez PNP para sa posibleng pagkakakilanlan ng ina ng bata.